തിരിച്ചറിവ്

ആദ്യമായി തളിരിട്ട പ്രണയം
നിൻ ഹൃദയതാളം എനിക്കായി
ശ്രുതി മീട്ടും പോലെ.
എൻ വിഷാദ കനലാഴിയിൽ
പെയ്തിറങ്ങി നീ വർഷമായി.
ഞാനവളെ മോഹിച്ചു
മോഹത്തിനു പ്രണയമുണ്ടായിരുന്നു
പ്രണയത്തിനു സ്വപ്നങ്ങളും.
സ്വപ്നത്തിന് കാത്തിരിപ്പിന്റെ നാളെകളും.
 

നിന്റെ കണ്ണുകളേക്കാൾ
നിന്റെ മെസ്സേജുകൾ
വായിച്ചതിനാലാകാം...
ഈ വിരലുകൾ എനിക്കിത്രമേൽ
പ്രിയ്യങ്കരമായത്.
 

എല്ലാം കരിപ്പിടിച്ച് എരിഞ്ഞടങ്ങി
കനവിലിപ്പോൾ കത്തിതീർന്ന
തിരി മാത്രമായി.
ഹൃദയം അത്രയ്ക്കും ശൂന്യമായി.
നിൻ ഓർമ്മകൾ ഈ തിരകളിൽ
അലിഞ്ഞതിലാണോ തീരമേ
നീയും മൗനത്തിലായത്?

പ്രണയമോ?
ഏയ് അതെനിക്കു ശരിയാവില്ല.
കൈവിട്ട മോഹത്തിന്
തിരിച്ചറിവിന്റെ നേരുണ്ടായിരുന്നു.
ഇന്ന്  മോഹിക്കുന്നതും  ആ  തിരിച്ചറിവിനെത്തന്നെ.
അക്ഷര തെറ്റിലൂടെ ഓരോ-
പ്രണയവും ആരംഭിക്കുന്നു.
തിരുത്തലുകള്‍ അവസാനിക്കുന്നിടത്ത് അതും അവസാനിക്കുന്നു.
ബന്ധനങ്ങളിൽ നിന്ന്
അഴിഞ്ഞുപോവുകയാണ്
ഇന്നാവശ്യം.
ഒരു കാർമേഘമായി വീണ്ടും
പെയ്യാനല്ല-
വാക്കുകളും ഓർമ്മകളും
നഷ്ടപ്പെട്ടൊരു പൊടിക്കാറ്റായി-
അലയാൻ വേണ്ടി മാത്രം.



(Note-എഴുതിയ സമയം,ഇത് ഞാനുമായോ മാറ്റരുമായോ യാതൊരു ബന്ധവും ഇല്ല സത്യത്തിൽ)